دبورية: الممرض اسلام عزايزة يوضح تفاصيل إصابته ويقدم رسالة مجتمعيّة مهمة

عمم الممرض اسلام عزايزة، من قرية دبورية، والذي شُخّص أنه مصاب بفيروس كورونا رسالة على ابناء بلده من خلال الفيسبوك.

واوضح اسلام، والمُعروف بأنه شاب مسؤول وخلوق وناجح، تفاصيل عن اصابته بالمرض، مضيفًا إليها همسة عتاب إلى أهل دبورية، بسبب التضييقات التي يتعرض لها هو وعائلته. 

نحن في موقع "بكرا" ننشر لكم الرسالة على أمل أن تساهم في رفع وعي مجتمعنا في كيفية التعامل مع العدوى ونشدد على ما جاء في رسالة اسلام عزايزة أنّ الوباء قد يصيب كل فرد، وهو ليس وصمة عار، المطلوب اتخاذ التدابير اللازمة والحيطة والحذر، ولا مجال لكيل الإتهامات لأي فرد كان. 

ونضيف إلى رسالة اسلام، تحية كبيرة له، ولكافة الطواقم الطبية التي تعمل على وصل الليل بالنهار للحفاظ على سلامتنا وامننا جميعًا، وهي رسالة كنا قد خصننا لها في "بكرا" مساحة كبيرة من خلال فيديوهات توعوية ومقابلات مع الطواقم الطبية. 

وقال فيها (ننشرها بلغته): انا الممرض الي انصبت بالكورونا بنطاق شغلي مش بنطاق اي محل ثاني الي هو بس بشغلي انا بعالج مرضى كورونا او الي بيجي مع عوارض كورونا ومنكونش متاكدين منو يعني احنا اكثر ناس معرضين ننعدي.

وأضاف: بنطاق شغلنا بفرض علينا كل اسبوع نعمل فحص عشان عائلاتنا وسلامة الناس. اعملت فحص قبل العيد وكان سلبي وما طلعت اعيد بدون ماكون متاكد انو سلبي.

واوضح: خلال شغلنا ممكن باي لحظه نعالج بني آدم مش مهم شو بكون وضعه الصحي ممكن يطلع ايجابي لكورونا واشي طبيعي المرض لا عيب ولا حرام لانه الانسان مرات بنعدي باي موقف واكيد محدا بحب ينعدي ويقعد بحجر صحي.

الإصابة 

واكمل: يوم السبت قبل ماروح عالبيت لانه عندي بنت صغيره عمرها 4 اشهر(الله يحميها) ومرتي واهلي بهموني كثير، قبل ماروح عالبيت اعملت الفحص عشان ماعرضش اي انسان للخطر وطلع الفحص سلبي وروحت عالبيت. الاحد اطلعت انا ومرتي وبنتي لانه النا اكثر من شهرين مش طالعين من البيت وحسب تعليمات وزارة الصحه وكل محل رحنا عليه اتاكدنا انو نقعد بعيد عن الناس اكثر من مترين عشان لا نخاطر بحدا ولا حدا يخاطر فينا وكمان التقيت باهلي ببيتهن واولاد اختي.

وأوضح: الاثنين ارجعت عشغلي واشتغلت من الصبح لليل. بالليل وانا نايم فقت حسيت وجهي حامي ومع انو مكنش علي حم بس احسن ماخاطر عالمحل رحت اعملت فحص بقسم الطوارئ بايخيلوف بدون ماقرب عحدا او حدا يقرب علي حسب التعليمات وبعد بساعه طلع الجواب ايجابي.

التدابير 

وقال: اول اشي اعملتو اتصلت على اهلي كلهن يفوتوا لحجر صحي واختي تجيب اولادها من ال גן عشان منعرضش حدا للخطر ولا اكون انا السبب. روحت وقاعد بغرفه لحالي وكل اهلي توجهوا لفحوصات بعد بساعه وكلهن صحتهن منيحه كثير. الحمدلله انا بشتغل مع مرضى كورونا ومعرض درجه اولى للمرض ومش عيب ومش حرام وماخذ كل الوقايه اللازمه وبعمل كل اسبوع فحوصات.

وقال: بعد بنص ساعه كل واحد عرفني اتصلي واتصل يتطمن علي بعرفش من وين عرفوا وكيف صار الخبر مذيوع مع انو مش عيب.

همسة عتاب 

واكمل: بس العيب الناس الي حكت حكي مش بمحلو واطلعوا دعايات على عيلتي وعلى اولاد اختي وكأنو عاملين جريمه قتل او شرف هون العيب. المرض مش عيب ومش حرام وانا انعديت من مرضى الي عالجتهن لانقذهن مش اشي ثاني لاسمح الله. الي بحب يحكي معي ومع عيلتي ويتطمن ويقوي معنوياتنا اهلا وسهلا والي بدو يطلع حكي بأذي فيي او بعيلتي عيب عليكوا الكورونا اهون بكثير من امراض ثانيه بكفي جهل ووسخ وحكي فاضي. شكرا كثير لكل انسان حكى معي يتطمن علي انا الحمدلله بخير بدون اي عوارض غير شوية تعب.

وقال: بالنسبه لاهلي الحمدلله لحد اسا محدا منهن مصاب بكل الاحوال فاتوا حجر صحي وبعملوا فحوصات كل اسبوع واذا حدا منهن انعدى ما منقول غير الحمدلله اجت هيك مش مرض عاطل الي وقتها الله بعلم وين منكون.

واوضح: لو سمحتوا الاشي صعب علي انا شخصيا بنتي 4 اشهر قاعد بشوفها بس عالفيديو والصور واهلي كذالك خافوا الله في عندكوا كلمه منيحه اهلا وسهلا فش عندكوا كلمه منيحه وحياتكوا تخبصوش وتطلعوش جهلكوا مش كل واحد مسك تليفون صار بعرف يحكي وبطلع دعايات عالناس.كل انسان كنت معاه باحتكاك وصلو تليفون وفات للحجر الصحي وانا يوم الاحد كنت بعد فحص يوم السبت العصر وكان سلبي فاماخاطرت بحدا ودايما بتعامل مع الامور بجديه.

وأختتم: شكرا للجميع الي حكوا معي واتطمنوا علي من جميع الجهات ان كان من الشغل او من الحياه الشخصيه والف سلامه للجميع. مرفق جواب يوم السبت 30/5/2020 תשובה שלילית.